UNITAL Hatama Ona Lista Graduasaun

DILI, STLNEWS.co – Universidade Oriental Timor Lorosae (UNITAL) hatama ona lista finalista neebe atu halao graduasaun ba Ministeriu Ensinu Superior Siensia no Kultura (MESSK).

Tuir Reitor Universidade Oriental Timor Lorosae (UNITAL), Florindo Pereira ba STL iha nia knaar fatin UNITAL, Kuarta (21/06/2023).

“Ohin dader mak sira foin lori lista ba MESSK, lista ba finalista neebe atu halo graduasaun nee hamutuk 100 ital, nee kompostu husi fakuldade 7, no departamentu 35, tanba husi UNITAL tinan ida halao graduasaun dala rua, tuir planu sei halo graduasaun iha loron 20 fulan Julhu tinan ida nee nian laran,” nia haktuir.

Nia dehan, numeru neebe ohin mensiona nee kompostu husi fakuldade direitu, ekonomia, agrikultura, edukasaun, fisipol, engenaria no saude, sira nee mak sei halao graduasaun iha fulan Julhu tinan ida nee.

“Ami nian preparasaun konaba serimonia graduasaun nee agora daudaun ami nian komisaun organizadora prepara ona, nomos dokumentus sira prepara ona para bele halo yudisium, tanba hafoin halo yudisium mak bele partisipa iha serimonia graduasaun,” nia dehan.

Nunee mos Reitor ISC, Sebastiao Perreira hatete, konaba lista nee sira seidauk hatama ba MESSK no sira seidauk halo preparasaun, tanba sira nian finalista balun hahu ezame daudaun ona.

“Ami seidauk hatama naran finalista neebe atu halao graduasaun ba MESSK, maibe bainhira lista nee prontu ona mak ami bele hatama lista nee ba MESSK,” nia afirma.

Sebastiao hatete, lista nee sira seidauk prepara, sira prepara hotu mak bele hatama ba iha MESSK, maibe too agora husi ISC nian seidauk hatama naran lista finalista nian ba Ministeriu Ensinu Superior.

Iha fatin la hanesan, bainhira STL tenta atu halo intervista ho Reitor UNDIL, Jose Agostinho Belo, maibe la konsege tanba la atende telefone.

(jac)

LEAVE A REPLY

Please enter your comment!
Please enter your name here