DILI, STLNEWS.co – Dosentes hirak neebe ho grau lisensiatura ka S1 nee tenki haruka sira ba kontinua estudu, tantu iha rai liur no rai laran.
“Ami nian dosentes S1 menus ona, la too 15, tanba ami haruka sira ba kontinua estudu iha rai liur no balun iha rai laran, neebe ami nian dosentes S1 nee 15 mai kraik deit ona, tanba dezde uluk hau seidauk tama nee sira balun hanorin ita nian estudante sira,” dehan Reitor UNITAL, Florindo Pereira ba STL, Kuarta nee (23/08/2023).
Florindo dehan, agora daudaun sira presiza mak dosente neebe atu hanorin estudantes iha area saude ninia, maibe ba fakuldade seluk nee dosentes iha hela, agora sira neebe ho grau lisensiatura nee mak daudaun haruka sira ba kontinua estudu iha rai liur no iha rai laran.
“Agora daudaun ami nian dosentes iha UNITAL hamutuk 200, ami nian estudantes kuaze 1000 tal,” dehan nia.
Iha fatin seluk, Visi Reitor III husi UNDIL, Hugo Lourenco da Costa hatete, agora daudaun iha UNDIL, dosentes S2 mak hanorin S1 sira, tanba hirak neebe ho grau lisensiatura haruka sira ba kontinua estudu.
“Ami nian kriteria dosente S2 mak hanorin S1, S1 haruka ba kontinua estudu, maibe atu hatene klean, diak liu husu rekursus umanus, tanba sira mk iha lista kompletu ba fakuldade 6, no 13 programa estudu,” nia esplika.
Iha fatin seluk, Reitor Institute Superior Cristal (ISC), Sebastiao Perreira hatete, iha ISC ninia dosentes barak mak S2 no S3, tanba durante nee sira sempre haruka ninia dosentes sira kontinua estudu, para husi lisensiatura ba mastradu no husi maestradu ba doutoramentu.
Entretantu, Diretor Ezekutivu ANAAA, Nilton Paiva hatete, agora daudaun halo hela avaliasaun iha Institute Superior Cristal, nunee sei labele fo komentariu ba asuntu ida nee, tanba sei okupadu hela.
(jac)
