DILI, STLNEWS.co – Bainhira Timor Leste adere ba Association of Southeast Asian Nations (ASEAN) iha benifisiu nomos dezafiu, tanba nee universidade sira tenki prepara rekursu umanu, atu nunee bele kompete.
Kestaun nee hatoo husi Reitor Institute Of Business (IOB), Pedro Ximenes ba STL iha nia knaar fatin Komoro, Segunda nee (17/04/2023).
“Hau senti husi parte governu nian infransturtura, diploma hau senti buat barak la halimar, ninia rekezitus atu adere ba iha ASEAN, hau senti governu iha halao prosesu atu kumpri rekerimentu sira nee hotu. Ita sei too iha neeba, maibe sei iha dezafiu barak, hau senti dezafiu nee normal, hakarak ka lakohi ita tenki preparadu,” nia dehan.
Nia dehan, hakarak ka lakohi TL tenki adere ba ASEAN, benifisiu sei barak maibe mos iha dezafiu barak.
Iha parte seluk, Hugo Lourenço da Costa hanesan Vise Reitor III Asuntus Estudantil husi UNDIL dehan, TL tama iha ASEAN, setor hotu tenki prepara aan ho diak. Agora universidade sira presiza prepara aan, liu-liu rekursu umanu para nunee bele halo kompetisaun ho nasaun hirak neebe mak pertensia ASEAN ninia.
“Hau senti ita atu tama iha ASEAN, primeiru ita tenki prepara aan, tanba bainhira ita tama iha ASEAN, nee ita sei halo kompetisaun ho nasaun seluk, se ita la prepara aan oinsa ita atu kompete ho ema, hau senti ita tenki prepara aan,” nia haktuir.
Iha parte seluk, Reitor ISC Sebastiao Pereira hatete, hakarak ka lakohi TL sei tama ba ASEAN, maibe importante mak tenki prepara aan, hanesan universidade sira iha TL bele halo kompetisaun ho universidade hirak neebe iha rai liur, maibe prepara mos idak-idak nian rekursu umanus, se laiha rekursu umanus oinsa mak bele kompete.
“Ita presiza prepara ita nian rekursu umanu, para ita tama iha ASEAN, ita bele kompete ho ita nian universidade neebe iha rai liur,” nia hatutan.
(jac)
