DÍLI- Ministru Petroleu no Rekursu Mineral (MPRM) Alfredo Pires hateten Timor-Leste aprezenta tan faktus ba tribunal arbitrazen internasionál, Deen Haag, Olanda, aban, tersa (18/02/2014).
Kestaun ne’e Ministru MPRM Alfredo fo sai ba jornalista sira, wainhira halao sorumutu ho Primeiru Ministru Kay Rala Xanana Gusmão, iha Palasiu Governu, Segunda (17/02/2014), katak iha loron 18 Fevereiru, TL sei hatama tan faktus ba tribunal arbitrazen relasiona ho kazu CMATS.
Dia 18 ita hatama tan faktus ba tribunal arbitrazen Den Haag, sasan hotu lao tuir planu, ne’ebé Timor-Leste laiha problema. Timor-Leste prontu kumpri tuir data sira ne’ebé tribunal arbitrasaun fó, dehan Ministru Alfredo.
Ministru Pires esplika, dokumentu memorial ne’ebé Timor-Leste intrega ba tribunal arbitrazen prepara husi ekipa advogadu Timor-Leste, kompostu husi advogadu Bernard Collaery, Sir Elihu Lauterpacht, Vaunghan Low inklui staf seluk.
Antes ne’e mós Primeiru Ministru Kay Rala Xanana Gusmão hasoru malu ho ekipa advogadu Timor-Leste iha Inglatera hodi deskuti sobre kazu CMATS. Informasaun kompletu iha STL Jornal no STL Web, edisaun Tersa (18/2/2014). Thomas Sanches