DILI, STLNEWS.co – Diretor Ezekutivu Servisu Autonomo Medikamentu no Ekipamentu Saude (SAMES), Santana Martins hatete, agora daudaun aimoruk kategoria tolu hanesan vital, esensial no nesesariu, nee balun stok mamuk iha armajen SAMES.
“Husi aimoruk vital nee rasik ita rejistu item neebe sempre uza iha 98 item. Husi numeru 98 item nee agora daudaun item 9 mak laiha. Definisaun husi item vital nee katak, tuir lo-loos nee item hirak nee labele mamuk iha ita nia fatin, depois aimoruk esensia nee ita rejistu ka utiliza nee iha 152 item, husi numeru nee stok laiha nee 21 item, nee stok mamuk, ba mos nesesariu nee 60 item, maibe kuaze item 10 mak laiha,” dehan nia ba jornalista sira iha SAMES Kampu Alor, Sesta (07/07/2023).
Nia dehan, stok out aimoruk nee kuaze 12% neebe mak laiha, dadus neebe mak iha ba servisu farmasiotika nee iha minutu ba minutu sempre mudansa.
Nia hatutan, esforsu neebe SAMES iha mak tenki ezekuta orsamentu 2023 neebe aloka tiha ona.
Nia afirma, orsamentu neebe aloka mai iha US$ 5.1 milhoens ezekuta hotu ona. Ezekuta hotu iha kontestu SAMES nian.
“Ami tenki komprende katak, bainhira ita estabelese kontratu, aimoruk nee iha kedas nee lae, tanba nee mak ami sempre husu ba Ministeriu Finansas, kuandu orsamentu neebe mak SAMES preve iha kategoria komitmentu ka obrigasaun, nee ami konsidera katak, orsamentu nee iha komitmentu no ezekuta,” nia tenik.
Nia afirma, aimoruk SAMES asina kontratu, ninia tempu lais mak depois de asina kontratu, tempu lais mak loron 90 no standar neebe mak durante nee SAMES iha nee loron 150, see loron 150 dias nee hatudu katak, presiza aimoruk ida tama mai rai iha laran nee, durante fulan 5 nia laran, neebe situasaun ida nee mak SAMES enfrenta hela, maibe nafatin ezekuta.
(nat)
