DILI – Sekertariu Jeral Partidu Fretilin Mari Alkatiri, fo obrigadu ba jornalista sira neebe maka durante fulan ida resin akompania prosesu diskusaun ba formasaun VII governu nian neebe Partidu mais votadus halo ho aliadu sira seluk.
Hau fo obrigadu ba jornalista sira durante tempu fulan ida resin, ho pasiensia akompania prosesu ida nee, tanba ho imi nia pasiensia hau mos hetan pasiensia atu lori prosesu ida nee lao ba oin,” dehan Sekjer Fretilin, liu husi konferensia imprensa neebe maka halao, iha Salaun Otel Novu Turismu Dili, Segunda (04/09/2017).
Iha parte ketak Direitor ONG Gertak Faustinho Magno hateten, liu husi jornalista maka ema hotu bele hetan informasaun, tanba nee husu ba jornalista sira atu halao nafatin knar ho independente no imparsialidade, atu nunee povu labele kestiona bebeik jornalista sira.
Liu husi maluk jornalista sira nia servisu maka ema hotu bele asesu ba informasaun, tanba nee hau husu atu ita boot jornalista sira halao knar ho independente atu nunee ema labele kestiona bebeik ita boot sira nia servisu,” dehan Faustinho.
Entretantu Jose da Silva hanesan jornalista hateten, maske Timor Leste foin ukun aan, maibe ukun nain sira valoriza ona servisu neebe maka jornalista sira nian halo durante nee. Carme Ximenes/Maria Lay
