DILI- Durante iha fulan Desembru nia laran, julgamentu nebe halao iha Tribunal Distrital Dili kuaze kazu violensia domestika (VD) mak makas liu, kompara ho kazu sira seluk. Maibe desizaun ba kazu refere maioria tribunal aplika deit pena suspensaun no pena multa ba arguido sira.
Hanesan iha kazu violensia domestika entre arguido Gabriel ho lejada Amelia da cruz. Kazu nee akontese iha loron 3 fulan Setembru 2013, lezada foin fila husi merkadu. Arguido Gabriel nebe hanesan lezada nia kaben husu ba lezada atu tein, maibe lezada lakohi, nune mosu diskusaun entre arguido Gabriel ho lezada, no husi diskusaun nee lezada tolok arguido Gabriel, no rona dereitamente husi arguido Hermengildo.
Nunee arguido Hermengildo hanesan arguido Gabriel nia aman, husu ba lezada tanba sa mak tolok ema mane nunee. Depois arguido fo basa dala rua iha lezada nia hasan sorin-sorin. Simu basa tiha husi nia banin mane, lezada halai tama ba kuartu laran , depois arguido Gabriel tuir lezada ba kuartu laran hodi tuku lezada nia kanuruk to lezada monu kedas ba kama leten. Maibe ikus mai to iha desizaun final, depois rona tiha deklarasaun husi arguido no lezada tribunal aplika deit pena aplika pena multa.
Nunee mos ho kazu hadau malu oan entre lejada Maria Vilar Moreira ho arguido Luis Oliveira. Kazu nee akontese iha loron 23 fulan Fevreiru 2013, iha Osindo. Lezada ba foti labarik iha uma arguido nian iha Rai Kotuk sein fo hatene ba arguido hanesan aman. Nunee arguido hirus hodi baku lezada dala ida halo lezada monu ba rai no tebe lezada nia kabun. Informasaun kompletu iha STL Jornal no STL Web, edisaun Sabado (28/12/2013). Domingas Gomes