DILI- Familia Saudozu Bernardino Simão Laranzinha alias Rakulima husu estadu Timor Leste, atu halo monumentu ba Saudozu ne’e ho kolega sira seluk nebe hanesan eis estudante Universidade Timor Timur (UNTIM), nebe oras ne’e muda ba Universidade Nasional Timor Lorosae (UNTL).
Tuir Familia Saudoju Filomeno Elisio Belo katak, to’o oras ne’e familia vitima seidauk hetan lolos saudozu nia rate, tan ne’e husu ba iha estadu atu halo saudozu nia monumentu iha UNTL atu nune jerasaun foun sira bele hatene historia involvementu Estudante sira iha tempu funu.
Estudante sira nebe maka fo nia Aan tomak iha tempu pasadu ba ukun rasik Aan ida ne’e, inklui mos saudozu Bernardino, ami hanoin presiza tebes monumentu ida atu sai hanesan historiku ba jerasaun foun, dehan Filomeno ba jornalista liu husi Konferensia imprensa, Tersa (28/01/2014) iha Bidau Santana.
Saudozu Bernardino Simão Laranzinha alias Rakulima mai husi Distritu Baucau, Sub distritu Quelicai nebe hetan oho husi Milisia iha 13 Abril 1999 iha Distritu Covalima, Sub Distritu Suai Vila kuandu Saudozu halao Estajiu iha Area neba.
Iha fatin hanesan Kaben husi Saudozu Rakulima Marcelina Pinto katak to’o oras ne’e saudozu nia isin mate seidauk foti, halo familia sira mos hetan moras hela deit, tan ne’e husu ba estadu halo halo netik monumentu ba saudozu nebe hanesan eis estudante Universidade UNTL. Informasaun kompletu iha STL Jornal no STL Web, edisaun Kuarta (29/1/2014). Timotio Gusmão