DILI-Governu liu husi Ministeriu Justisa selebra festa natal hamutuk ho fungsionariu sira hodi halo reflesaun kona ba saida mak ministeriu nee halo ona iha tinan 2013, no saida mak presija atu halo fali iha tinan foun 2014. Ho esperansa boot katak iha 2014 nee fungsionariu sira bele aumenta tan kualidade servisu ho diak para serbi povu rai doben ida nee.
Ministru Justisa Deonisio Babo hatete, liu husi festa natal ida nee hodi halo reflesaun ba servisu ministeriu nain nebe mak halao ona iha tinan tuan 2013 no saida mak atu halao iha tinan 2014. Festa natal nee hanesan festa sentido familia Ministeriu Justisa hodi halo amizade para bele metin liu iha familia ministeriu nee nian.
Ita ba servisu laos atu servisu deit, maibe presija presta kualidadde servisu nebe mak diak. No atu presta kualidade nebe diak ita presija atu hametin liutan iha tinan 2014. Hodi nunee bele halo servisu ministeriu nian ho diak ba povu sira, dehan MJ Babo iha salaun Delta Nova, Segunda (30/12).
Nia haktuir liutan katak, maske iha difikuldade barak Ministeriu Justisa hasoru iha 2013, espera katak ho tinan foun 2014 hotu-hotu bele esforsa-an hodi hadia an iha familia uma ministeriu justisa nian. Fungsionario sira presija haforsa-an diak liutan hodi serbi povu tomak iha TL.
Iha fatin hanesan Direktur Geral Ministeriu Justisa Fransisco Carçeves hatete, ho sentido festa natal nee espera tinan foun 2014 bele lori dame no pas ba familia ministeriu justisa nian. Fungsionario hotu ho vontade foun atu halao service ho diak. Informasaun kompletu iha STL Jornal no STL Web, edisaun Tersa (31/12/2013). Domingas Gomes