DILI – Oras nee atu besik eleisaun suku, tanba nee feto sira atu sai lideransa lokal, tenke ukun ho domin no laran, laos tanba deit kargu mak buka sai suku.
Tuir Primeira Dama Isabel Fereira katak, haree ba loron ba votasaun eleisaun suku besik ona, nia hatoo parabens ba feto sira neebe mak atu kompete iha eleisaun suku, neebe hein atu hodi ba halo votasaun, no feto mos atu bele sai lider lokal.
Hanesan feto hau hakarak husu ba maluk feto sira katak ita tenke prepara aan ba atu sai suku laos tanba kargu deit, maibe hanesan feto ou inan ida oinsa mak atu jere tempu atu hodi sai hanesan jestor no edukador iha ita nia pozisaun neebe mak ita okupa atu hodi hatudu rezultadu,” katak Isabel ba Jornalista Tersa (11/10/2016) iha Ministeriu Edukasaun Vila-Verde.
Nia hatete, bainhira feto sai suku nee nia rezultadu mak atu hatudu, tenke servisu ho domin hodi servi povu ho fuan ho laran tomak, atu hodi tau matan ba povu no halo mudansa ba fatin neebe mak ukun ba povu sira nia moris.
Iha fatin ketak, Dosente UNTL husi Fakuldade Ekonomia Pedro Mateus Tanazio hatete, feto sira bainhira sai lider lokal tenke buka oinsa atu dezenvolve suku ida-idak, atu nunee povu sira bele fo fiar nafatin. Maske durante nee mane barak mak ukun iha lider lokal, maibe haree sira nia kontribuisaun diak, agora mos atu fo tempu ba feto sira para oinsa feto mos bele hatudu sira nia kapasidade dezenvolve suku. Informasaun kompletu iha STL Jornal no STL Web, edisaun Kuarta (12/10/2016). Guilhermina Franco / Jacinta Sequeira