Formasaun ba Juis, TDD Laiha Julgamentu

DILI-Tribunal Distrital Dili (TDD) iha loron (19/02) laiha atividade julgamentu tanba juis sira tuir hotu formasaun, nunee kazu sira neebe mak marka iha loron nee tenke adia hotu ba loron seluk.

Tuir official justisa neebe lakohi temi naran hatete, Sesta nee laiha julgamentu iha tribunal, tanba juis sira ba tuir hotu formasaun. Tanba nee kazu neebe mak marka tiha ona iha loron ohin tenke muda fali ba loron seluk, I depois mak tribunal notifika fali arguidu, vitima no sasin sira hodi mai tuir fali julgamentu neebe mak sei marka fali ba loron seluk.

Nia hatutan, tanba loron julgamentu determina ona, entaun arguidu, vitima no sasin sira neebe mak iha kazu tenke mai tuir julgamentu. Maibe tanba juis sira iha formasaun entaun sira tenke fila fali. Nunee mos ba prokurador no defensor publiku sira neebe mak kaer prosesu julgamentu iha loron nee tenke fila fali ba sira nia eskritorio tanba laiha julgamentu.

Iha fatin hanesan arguidu Agustinu Soares hatete, loron nee nia labele tuir julgamentu ba nia prosesu neebe mak tama ona mai iha tribunal, tanba juis sira laiha. Nunee nia tenke fila fali ba uma hodi halao nia aktividade. Depois simu fali notifikasaun husi tribunal mak nia mai fali tuir julgamentu.

Nunee mos sasin Maria Ribeiro katak, ohin loron nia mai iha tribunal atu sai hanesan testamunha ba kazu ofensas ida. Maibe too iha tribunal official justisa sira dehan ohin laiha julgamentu tanba juis sira tuir formasaun, neebe hein depois tribunal notifika fali mak mai.  Informasaun kompletu iha STL Jornal no STL Web, edisaun Sabado (20/2/2016). Domingas Gomes

LEAVE A REPLY

Please enter your comment!
Please enter your name here