DILI, STLNEWS.co – Governu liu husi Ministeriu Juventude Desportu Arte no Kultura (MJDAC – sigla portugues) preve orsamentu ho montante US$ 5 mil, hodi komemora loron Internasional Juventude neebe sei realiza iha Munisipiu Kovalima.
Lia hirak nee hatoo husi Diretor Diresaun Nasional Juventude MJDAC, Jacinto Ximenes ba STL iha nia knar fatin MJDAC, Lesidere, Dili, Segunda (07/08/2023).
Nia afirma, loron Internasional Juventude nee MJDAC iha tempu uluk bolu SEJD, nafatin iha komitmentu para apoiu atividade ida nee. Intensaun husi apoiu atividade ida nee, tanba atu solidaria ba loron mundial juventude nian.
“Loron mundial neebe mak realiza iha Munisipiu Kovalima, governu liu husi MJDAC apoiu ba komemorasaun nee ho montante US$ 5 mil, no ita mos hetan apoiu husi UNFPA 4 mil, maibe komemorasaun ida iha Munispiu Dili nee direitamente UNFPA ho komisaun organizadora mak implementa,” dehan nia.
Nia hatete, tanba nee mak tinan-tinan apoiu nafatin, no iha tinan ida nee implementa atividade ida nee iha fatin rua, ida iha Kovalima no Dili.
Nia informa, atividades neebe mak realiza iha Dili nee sei hahu iha loron 10 Agostu ho nia atividades mak hanesan Marsa Saudavel, jogu amigavel nomos konsertu hodi anima juventude sira inklui doasaun raan, atividades neebe mak realiza iha Kovalima hahu husi dia 8 too 12 Agostu mak hanesan seminariu, jogu amizade, kalan animasaun inklui vizita fatin autoempregu juventude sira, diskursu no desportu rekrativu.
Entretantu, loron Mundial Juventude nee monu iha loron 12 fulan Agostu no tema prinsipal ba komemorasaun nee mak abilidade verde ba juventude dezenvolvementu sustentavel.
Iha sorin seluk, Prezidente Komisaun Organizadora ba Selebrasaun Loron Mundial iha Munisipiu Dili, Mateus Lemos Soares hatete, preparasaun husi komisaun organizadora ba selebrasaun loron internasional loron juventude nian iha Timor Leste, hanesan hatene katak loron 12 fulan Agostu loron neebe dedikadu mundialmente juventude.
“Objetivu atu enkoraja no fo prestiju ba foin sae sira, atu hateke hetan problema sira haleu juventude no foin sae sira liu-liu iha Timor Leste,” dehan nia.
Nia tenik, bazeia ba ida nee governu liu husi MJDAC hamutuk ho parseriu UNFPA konvida organizasaun juventude sira hotu liu-liu Conselho Nasional Juventude Timor Leste hanesan mahon ba juventude sira, hamutuk ho komisaun organizadora para prepara atividade sira neebe mak atu halao iha kapital Dili.
Nia dehan, governu nia prioridade ba selebrasaun loron juventude nee konsentra iha Kovalima, entaun iha Dili nee hanesan kapital nasaun nian, hanoin katak tenki organiza atividades balu iha nee para atu mobiliza joven sira neebe la hetan espasu ba Suai, sira hotu bele hola parte iha atividades ida nee.
(mar)
