DILI-Too agora komunidade sira neebe mak hela besik iha area eskola, laiha konsiensia hodi husik no kesi animal livre iha area eskola, tanba nee, parte ekipa inspeksaun husi edukasaun Munisipiu Dili, sei fo orientasaun ba estrutura eskola.
Tuir Superintendente edukasaun Munisipiu Dili, Virgilio Freitas Cabral hatete, iha eskola 4 de Setembru, agora sei iha konstruksaun moru eskola, neebe sira sei haree, maibe bainhira moru eskola nee remata, sira sei fo fali orientasaun ba iha estrutura no direitor eskola sira.
Ami sei fo fali orientasaun ba iha estrutura no direitor eskola sira, atu nunee labele kesi no husik animal livre iha area eskola ninia, sekaraik ami hasai tiha sirklar ida nee, mak sira la tuir buat ida nee, entaun ami sei hatoo ba iha Munisipiu para atu bele haree kestaun ida nee. Ami nia ekipa inspeksaun ami halo ba iha eskola hotu, tanba dala ruma animal livre iha area eskola ninia, tanba eskola nee rasik seidauk iha moru,” dehan Virgilio ba STL iha edifisiu ME Vilaa-Verde Dili Kuarta (21/12/2016).
Iha parte seluk, Direitor eskola sekundaria jeral no 4 de Setembru Balide, Alberto Braz dehan, animal sira neebe mak kesi no husik iha area eskola, laos komunidade husi bairo seluk mak mai kesi, maibe sira neebe mak hela besik iha area eskola mak lori sira nia animal kesi no husik livre iha area eskola.
Nunee mos, Maria dos Santos, hanesan estudante terseiro ano hatete, eskola nee bainhira atu tama iha loron feriadu, professor sira haruka halo limpeja iha, nunee estudante sira lori aifunan no ai horis ruma para bele kuda iha eskola. Informasaun kompletu iha STL Jornal no STL Web, edisaun Sesta (23/12/2016). Jacinta Sequeira/Guilhermina Franco