DILI-Tribunal Distrital Dili (TDD) halao julgamentu ba kazu violensia domestika nebe ministeriu publiku akuza Gilbertu Corria hanesan arguido no Fernanda Agusta da Silva hanesan lezada.
Liu husi audensia julgamentu lezada deklara ba tribunal katak, iha loron 1 Janeiru 2013 lezada senti ulun moras, nunee nia haruka arguido atu buti nia ulun, maibe arguidu haruka fali nia inan mak atu buti lezada nia ulun. Nunee lezada lakohi, nia hakarak arguido mak buti nia ulun.
Nunee arguidu dehan ba lezada katak ‘’o par halo an’’ arguido tuku isin ida ba iha lezada nia matan laran, depois arguidu duni kedas lezada sai husi uma. Nunee lezada halai ba lezada nia inan aman nia uma.
Lezada mos informa ba Tribunal katak durante nee arguido baku bebeik nia, dala ruma semana ida dala ida ou dala rua, maibe lezada la informa arguidu nia hahalok nee ba polisia. Nia hein katak arguido atu modifika nia hahalok, maibe arguidu la modifika nia hahalok.
Iha fatin hanesan arguidu deklara katak momentu ne’e nia la tuku lezada, maibe nia basa dala ida deit, no nia baku bebeik lezada, tanba arguidu haruka lezada ba fase ropa no tein lezada lakohi nemak arguidu baku lezada.  Informasaun kompletu iha STL Jornal no STL Web, edisaun Sabado (9/11). Domingas Gomes