Identifika Tan Autor Rama Ambon 2, PNTL Hein Karta Kapturasaun

DILI – Polisia Nasional Timor Leste (PNTL) identifika tan ona autor nain 2 neebe mak hana ema uja rama ambon iha tempo kalan, no oras nee PNTL hein hela karta kapturasaun husi Tribunal.

Deklarasaun nee fo sai husi Segundu Komandante Jeral PNTL Komisariu, Faustino da Costa, ba jornalista sira iha Palacio Governu Tersa (14/06/2016).

Los duni iha semana rua nia laran nee iha asaltus maibe ita sempre kaer hanesan horseik kalan (segunda kalan_red) ita kaer nain hira kedan no hau tau dehan deit katak iha kazu ida neebe ema uza rama ambon tiru nee ami hein hela mandatu kapturasaun no provizoriumente ami detekta ona ema nain 2,” dehan Faustino.

Nia husu ba komonidade hotu atu halo koperasaun ou servisu hamutuk ho PNTL hodi bele garantia siguransa iha rai laran, tanba se Polisia mesak deit maka sei la halo buat ruma.

Iha fatin ketak tuir observador politika Abrao dos Santos iha ninia estudu fatin UNTL Caicoli hatete maske krime nee ladun boot, maibe tenke tau atensaun seriu hodi hamate atu nunee labele mosu tan ida neebe mak boot liu.

Tuir informasaun neebe mak STL hetan oras nee PNTL kontinua identifika autor sira seluk neebe mak diskonfia infolve iha krime hana ema iha tempo kalan maske balu susar atu identifika. Informasaun kompletu iha STL Jornal no STL Web, edisaun Kuarta (15/6/2016). Thomas Sanches

LEAVE A REPLY

Please enter your comment!
Please enter your name here