BAUCAU– Agrikultores iha Postu Administrativo Vemasse, Munispiu Baucau kontinua halai natar ba segundu Epoka nian tanba irigasaun Bulutu lao diak hela no lakohi natar iha Vemase husik abandona no bee suli saugate deit ba Tasi.
Tuir Agrikultor Domingos C. Ramos katak razaun kuda hare variedade nakroma iha segundo efoka ho razaun tanba hakarak aproveita bee irigasaun bulutu labele husik suli abandona ba tasi.
Ami nudar agrikultor hakarak halai natar segundo epoka nian tanba lakohi natar iha vemasse neebe simu bee husi irigasaun bulutu husi abandona ba tasi” dehan Domingos.
Iha fatin hanesan Diretor Serbisu Agrikultura Rejiaun Baucau Fernando Soares katak vizitasaun nee nia parte halao ho objetivo atu monitoring planu neebe Ministeriu trasa tiha ona atu implementa demonstrasaun kuda hare no mos demonstrasaun pilotu natar Vemasse ho Laleia, liu-liu natar sira neebe irigadu husi irigasaun Bulutu nian.
Realidade ohin hau mai hare katak buat hotu-hotu lao diak, sira implementa ona demplot ke hetan koperasaun diak husi agrikultor husi estensionista no mos husi kordenador fini ponta leste ninian, sira implementa tuir proposta neebe tuir diresaun agrikultura hortikultura estensaun halo, husi demplot neebe sira iha sira mos hakarak enkaixa tan programa ida kuda hare akompana hakiak ikan (Mina Padi) ba iha periodu ida nee sira nia perparasaun diak, fini ikan mos iha, ohin hare kuda ona buat hotu-hotu sei lao normal” katak Diretor Map Rejiaun Baucau Fernando Soares ba jornalista, Tersa (22/8) iha Vemasse.
Diretor nee hateten, programa Mina Padi neebe agrikultor halo hanesan inisiativa integradu neebe Ministeriu orienta, katak aleinde kuda hare, aproveita bee neebe ke iha, akompana hakiak mos ikan.
Maibe, buat neebe sai Preokupasaun mak forsa bee husi irigasaun Bulutu mak komesa menus, maske nunee Diretor nee garantia bainhira segunda epoka, hare neebe grupo agrikultor kuda ho sistema lina too fulan Novembro mak sei fo rezultadu diak.
Entretantu, Basilio Da S. Pires nuudar ofisial fini Munisipiu Baucau hateten razaun ninia parte serbisu hamutuk ho agrikultor sira iha postu Vemasse, oinsa atu produs fini hare variedade nakroma iha tempo bailoron hodi nunee hapara importasaun fini husi rai liur mai tanba bee irigasaun Buluto sufisiente.
“Razaun ami halo natar iha tempo bailoron nee tanba ami hakarak informa ba agrikultor sira katak bazeia ba objetivo Ministeriu nian atu hasae produsaun rai laran hodi nunee oinsa hamenus importasaun fini husi rai liur mai” dehan Basilio. Emerenciana Pinto
