DILI, STLNEWS.co – Autoridade lokal konsidera joven sira neebe kria problema no hadau ema nia sasan iha tempu kalan, nee tanba Timor Leste menus kampu trabalhu.
Kestaun nee hatoo husi Xefi Suku Kaikoli, Hipolito Marques Sarmento ba STL iha Kaikoli, Dili, Kinta nee (27/07/2023).
Nia dehan, tuir parte autoridade lokal nia haree ba problema neebe mak sempre akontese no komete husi joven sira nee krimi, maibe husu fali ba estadu no governu razaun saÃda mak buat sira nee akontese. Tanba nee mak husu ba estadu no governu kria kampu trabalhu ba iha Timor oan, atu nunee hodi haree took joven sira nee sei kria problema no naok nafatin ka lae.
Nia haktuir, tanba kampu trabalhu laiha, joven sira nee tenki naok no oho malu, nee parte ida atu fanun governu, oinsa governu atu haree fukun husi problema nee.
“Hau husu ba governu ida nee atu kria took kampu trabalhu ba joven sira teritoriu laran,” katak nia.
Nia dehan, kuandu governu la kria kampu trabalhu, konserteja joven hirak nee sei kontinua nafatin halo asaun sira nee.
Iha sorin seluk, membru husi Fundasaun Mahon, Narciso da Lopes da Cruz hatete, joven sira halo asaun sira hanesan nee dala ruma mos tanba kampu trabalhu, depois iha prosesu edukasaun mos la hanorin oinsa atu buka osan.
“Ita koalia honestu deit katak, Timor Leste nee ita atu koalia konaba asesu ba kampu trabalhu nee difisil, nia problema nee husi setores barak hanesan primeiru mak ekonomia,” dehan nia.
Nia hatete, tanba governu seidauk iha planu estratejiku ida hodi halo investimentu ida konaba ekonomia, kuandu ekonomia iha rai laran difisil, entaun impaktu ba foin sae sira.
Kuandu foinsae sira la hetan kampu trabalhu, entaun sira hanoin barak, sira loron-loron tur badiu fila uma ransu hemu lanu fila halo problema.
(mar)
