DILI–Joventude Voluntariu hosi Japaun hamutuk nain 4, Kinta (6/5) halo vijita kortezia ba Palacio Governu hodi hasoru malu ho Primeiru Ministru Interinu, Fernando La Sama de Araujo. Iha vijita ne’e joventude nain 4 lidera hosi Embaisador Japaun iha Timor Leste, Yoshitaka Hanada hamutuk ho Xefe Reprejentante Ajensia Koperasaun Internasional Japaun (JICA).
Tuir Embaisador Japaun iha Timor Leste, Yoshitaka Hanada, katak joventude voluntariu hirak ne’e nudar membru hosi Japan Overseas Cooperation Volunteers (JOCV), programa koperasaun ida ne’ebe mak hetan apoiu hosi governu TL iha rai laran.
Sira nain 4 mai hosi Overseas Cooperation Volunteers (JOCV), programa koperasaun ida ne’ebe mak hetan apoiu hosi governu TL iha rai laran no governu japaun hahu programa ne’e iha tinan 1965 no haruka ona mais ou menus voluntariu 40,000 ba nasaun 90 ne’ebe mak foin dezenvolve an iha mundu tomak, hatete Yoshitaka Hanada.
Iha fatin hanesa tuir, Kenji Harasawa, ne’ebe fo treinamentu Akido ba polisia sira iha centro formasaun Policia Comoro hatete agora dadaun nia hanorin eskuadra hamutuk nen ho estudante 40, kada semana no nia mos produs ona Akido manual ida hanesan parte hosi kurikulu nian.
Responde ba vijita joventude voluntariu Japaun nian, Primeiru Ministru Interinu, Fernando La Sama de Araujo, hatete grupu voluntariu hirak ne’e mai atu fahe sira nia matenek ba Timor oan sira iha area lubuk ida, ne’ebe mak TL persija tebes atu aprende. Informasaun kompletu iha STL Jornal no STL Web, edisaun Sesta (7/2/2014). Thomas Sanches