DILI-Tribunal Distrital Dili Kinta (19/09), kontinua halao julgamentu ba kazu krime graves ou kazu 1999 nebe deskinfia grupu Milisia Ahi halo asaun sunu uma, oho no baku Populasaun iha Distritu Aileu, maibe sasin balun la hatene populasaun nebe mak mate iha tempu neba.
Iha Audensia Julgamentu parte dader tribunal konsege rona deklarasaun husi sasin Vicenti Dias Mendosa, Manuel Lorenso de Carvalho, Miguel de Carvalho,Felismino Bonaprte, Jose Mendonsa, Manuel da Silva no Joao Maurua.
Sasin hirak nebe mak tribunal rona sira nia deklarasaun Maioria la hare ho matan Milisia sira sunu uma, maibe rona deit informasaun maske sira nia uma mos ema sunu, vitima nebe mak mate iha tempu neba sira mos lahatene.
Liu husi Audensia Julgamentu Manuel Lourenso nebe hanesan sasin deklara ba tribunal katak nia kuinese arguidu sira, maibe laiha relasaun familia rasik lahatene altura tinan 1999 milisia sira sunu uma no oho ema iha distritu Aileu.
Sasin Miguel de Carvalho nudar membru Milisia AHI hatene xefi mak arguidu Tomas Mendonça, sira tama milisia atu depende povu Aileu, hodi faselita populasaun evakua ba Atambua Timor Osidental. Informasaun kompletu iha STL Jornal no STL Web, edisaun Sesta (20/9). Timotio Gusmão