DILI-Organizasaun Noun Govermental (ONG) Luta Hamutuk (LH), konsidera Komisaun Anti Korrupsaun (KAK) hanesan Leão hodi halo prevensaun no kombate korrupsaun, maibe laiha nehan atu tata koruptor ka nauk te’en.
Kestaun ne’e hato’o husi diretur ezekutivu Luta Hamutuk Mericio Akara ba jornalista sira, iha nia servisu fatin Farol, katak KAK hanesn Leão, nebe ema rona tauk, maibe sira laiha nehan atu tata.
Ami hanoin katak KAK hanesan Leão, ema rona tauk duni, maibe sira labele tata ema. Sr Aderito dehan maka’as ka Supermen mos nia labele halo buat ida tanba nia Nehan (lei) ne’e laiha, hatete Diretor Ezekutivu ONG Luta Hamutuk, Mericio Akara ba Jornalista sira iha nia servisu fatin Farol, Kuarta (19/02).
Mericio Akara, mos hatutan tan katak Luta Hamutuk, kritika maka’as Parlamentu Nasional (PN), tanba la tau prioridade ba Lei Anti Korrupsaun atu reforsa KAK, hodi halo prevensaun ka tata koruptor sira.
Iha fatin ketak tuir Komisariu KAK, Aderito de Jesus, ho haraik an husu ba publiku tomak atu suporta servisu KAK, tanba KAK hanesan institusaun foun ida ne’ebe mak foin tinan 4 nia laran, maibe KAK mos halo ona buat balu ne’ebe susesu maske seidauk prefeitu. Informasaun kompletu iha STL Jornal no STL Web, edisaun Sesta (21/2/2014). Thomas Sanches