Kazu CCT Lakon Osan Rihun 200 Resin, Tribunal Kontinua Rona Sasin

DILI-Tribunal Distrital Dili (TDD) kontinua rona deklarasaun sasin ba kazu abuzu konfiansa neebe involve arguida Eugenia da Costa Alves hasoru instituisaun Cooperativa Café Timor (CCT).

Liu husi audensia julgamentu tribunal kontinua rona deklarasaun sasin Filomeno Fatima nudar Supervisor Rekursu Umanu iha CCT katak, nia konese arguida tanba uluk iha 2012 servisu iha CCT. Kona ba osan rihun 200 resin neebe lakon nia laiha konesimentu maibe nia so hatete deit kona ba osan rihun 3000 neebe mak lakon uluk nee. Kompetensia tomak finansas nian iha momentu neeba neemak Konsultan Administrasaun Oscar, no tempu nee nia fila tiha ba Filipina mak osan nee lakon.

Nia hatutan, fatin servisu ho arguida ketak-ketak no dook malu. Neebe konaba osan neebe lakon nia parte la hatene.

Iha fatin hanesan sasin Cecilio da Costa hateten iha 2012 hanesan Manager Administrasaun Finansas, nia servisu iha CCT hahu kedas 1997 too 2013, tanba hetan bolsu estudu husi governu hodi kontinua estudu iha estrangeiru. Wainhira osan nee lakon iha CCT nia sei kontinua servisu, nia sai tanba hetan bolsu estudu neemak nia para tiha.

Kona ba osan neebe lakon nee nia iha konesementu, neebe momentu nee sira mak ba halo peskiza iha terenu hodi buka tuir kona ba karau instituisaun nian neebe fan ona maibe osan mak seidauk tama iha finansas. Neemak hodi husu tuir ba arguida katak osan nee iha neebe, no bainhira hatene dehan osan nee laiha arguida rasik mak deklara katak nia prontu atu fo fila fali osan sira nee. Neemak momentu nee halo deklarasaun maximu hodi fo ba arguida asina nomos CCT para arguida bele fo fila fali osan nee.

Tuir akuzasaun husi ministeriu publiku katak iha tinan 2011 no 2012 arguida Eugenia da Costa Alves nudar Finansas Administrasaun iha instituisaun Cooperativa Café Timor (CCT). Nia mak toma konta kaer xave brankas osan kooperativa nian.

Hatan ba akuzasaun nee arguida deklara katak, akuzasaun nee balun los no balun la los. Los duni nia hanesan finansas iha CCT, maibe kona ba osan nee laos nia mak foti. Tanba momentu nee xafe brankas osan nian laos nia mesak mak kaer, maibe Konsultan Finansas Oscar ho Manager Administrasaun Cecilio da Costa mos kaer hotu xave brankas osan instituisaun nian. Informasaun kompletu iha STL jornal no STL Web, edisaun Tersa (15/3/2016). Domingas Gomes

LEAVE A REPLY

Please enter your comment!
Please enter your name here