DILI-Tribunal Distrital Dili (TDD), Segunda (28/10) aplika pena Admoestação ka pena peringatan ba arguido Julio Cardoso de Carvalho, nebe baku lezadu Renaldo Cardoso iha 11 Agustu 2011, iha distritu Ermera.
Liu husi audensia, tribunal le’e sai akuzasaun nebe mak iha Ministeriu Publiku katak iha loron 11 Agustus 2011, Arguido bolu lezadu atu ba foti nia jaket, maibe lezadu lakohi. Hodi nunee arguido basa dala rua, depois lezadu halai arguido duni tuir hodi baku no tebe tun ba rai.
Hafoin le’e tiha akuzasaun hirak nee, tribunal husu ba arguido Julio Cardoso de Carvalho katak akuzasaun sira nee los hotu ka lae. Hatan ba kestaun nee, arguido konfesa katak akuzasaun sira nee los hotu. No nia deklara katak nia halo duni violensia domestika (VD) ba lezadu.
Rona deklarasaun husi arguido kona ba akuzasaun nebe le’e sai husi tribunal, Parte Ministeriu Publiku no defensor publiku husu ba tribunal atu aplika pena admoestação ba arguido. Tanba depois akontesementu, parte rua rejolve familiar tuir costume Timor nian.
Audensia nee prejide husi juis kolektivu Dr. Antonio Helder, reprejenta ministeriu publiko Dr.Manuel Amaral, no arguido hetan asisitensia legal husi defensor publiko Dr. Renaldo Cardoso. Informasaun kompletu iha STL Jornal no STL Web, edisaun Tersa (29/10). Domingas Gomes
