DILI—Kintu Governu Konstitusional, halao sorumutu, Tersa (13/8) iha Palásiu Governu hodi halo ona aprovasaun ba Rezolusaun Governu ne’ebé mak aprova Efektivu Anuál atu Inkorpora iha F-FDTL nian.
KM aprova ona Rezolusaun ne’ebe aprova efektivu anuál atu inkorpora (halo parte) iha F-FDTL ba tinan 2014. Rezolusaun ida ne’e mosu tanba iha nesesidade atu kumpri objektivu hirak ne’ebé estabelese ona iha orientasaun estratéjika sira (Forsa 2020), ne’ebé mak prevee efektivu sira na’in 3600 (rihun tolu atus neen) to’o iha tinan 2020, hodi defini katak efektivu anuál ne’ebé atu inkorpora iha tinan 2014 mak feto/mane na’in 500 destinadu ba klase Prasa.
KM mos hare ba iha Dekretu Lei ne’ebé Aprova Alterasaun Dahuluk ba Dekretu-Lei ne’ebé Aprova Estatutu Karreira Dosente Universitária nian. Ministériu Edukasaun hetan ona aprovasaun ba Dekretu-Lei ne’ebé aprova alterasaun dahuluk ba Dekretu-Lei no 7/2012, loron 15 fulan Fevereiru, kona-ba Estatutu Karreira Dosente Universitária nian.
Rejime progresaun iha kareira dosente ne’ebé kontempla iha diplona ida ne’e, konsagra regra kritériu nian lubun ida, atu hetan fiar, hanesan promosaun ba korpu dosente ne’ebé exelente, instituisaun ensinu superiór nian sira no sistema ensinu superiór timoroan nian rasik, públiku no privadu. Informasaun kompletu iha STL Jornal no STL Web, edisaun Sesta (16/8). Oscar Salsinha