DILI—Sorumutuk Konsellu Ministru (KM), Tersa (25/6) iha Palasiu Governu Dili, diskuti ona kriteria ba distritu balun ne’ebe priense ona rekezitus kona munisipiu.
Razaun ida ne’e, iha sorumutuk Konsellu Ministru, Primeiru Ministru (PM), Kay Rala Xanana Gusmao hatudu Sekretariu Estadu Desentralizasaun Administrasaun (SEDA), Tomas Gabral ho Sekretariu Estadu Konsellu Ministru (SEKM), Avelino Coelho atu prepara ajenda hodi koalia kona ba politika desentraliazasaun, antes atu tama ba iha diskusaun tekniku struktural nian.
Tuir, SEDA, Tomas do Rosario Cabral ba STL iha Palasiu Governu, Dili, Tersa (25/6), katak agora dadaun sorumutuk Konsellu Ministru hahu debate ona Kriteriu kona ba munisipiu ninian. Ne’eduni, Primeiru Ministru, Kay Rala Xanana Gusmao maka desidi tiha ona katak SEDA ho SEKM atu marka ajenda hodi diskuti klean liu tan kona politika desentralizasaun.
“Hau ho Sekretariu Estadu ba asuntu Konsellu Ministru atu prepara fali ajenda sai husi Dili, hodi aprova politika kona ba desentralizasaun. Politika ne’e maka mata dalan depois atu tama ba iha diskusaun tekniku strutura distritu ninian,” nia hatete.
Alende ne’e, SEDA ho SEKM atu kria komisaun instaladora, importante maka governu tenke aprova uluk lai politika ne’e maka atu define, oinsa atu prezidi kona ba funsaun komisaun instaladora atu halo saida. Depois ida ne’e komisaun Indepedente halo tiha avaliasaun kondisaun minimu ba iha munisipiu 13, ida ne’ebe priense ona kriteria maka foin abansa ba iha aleisaun. Informasaun kompletu iha STL Jornal no STL web, edisaun Kuarta (26/6). Oscar Salsinha