DILI-Deklarasaun arguidu Orlando Mendes no Lezada Judit da Conceição iha Tribunal Distrital Dili, hamosu Duvida ba juiz, Ministeriu Publiku inkliu parte defeza iha iha Tribunal Distrital Dili, tamba ne’e Tribunal disidi sei rona deklarasaun husi sasin.
Liu husi Audensia Julgamentu Kinta (12/09/2013) Tribunal fo sai akuzasaun husi Ministeriu Publiku katak arguidu ho lezada moris hamutuk hanesan fen ho laen iha 2006 no hetan oan nain 4. Iha loron 21 Agustu 2011 lezada fila husi igreja bainhira tama ba uma laran arguidu basa lezada nia hasan sorin karuk, rasta monu ba rai hodi sama to’o nia kotuk laran sofre kanek. Ho hahalok ne’e MP akuza arguidu ho krime violensia domestika tuir artigu 145 kodigu penal Timor Leste.
Remata rona akuzasaun nebe lee sai husi juiz, arguidu Orlando Mendes deklara ba Tribunal katak nia parte nega faktus nebe iha lalos hotu, tanba altura neba laos arguidu mak baku lezada.
Ho Deklarasaun Arguidu nian tribunal konfirma ba lezada Judit da Conceição, nia parte kontinua mantein deklarasaun iha Ministeriu Publiku katak akuzasaun los tanba momentu sai misa arguidu mak basa duni lezada, dala rua iha hasan karuk, rasta monu ba rai kontinua sama iha kotuk laran mak hader halai liu ba eskuarda polisia Becora.
Relasiona ho deklarasaun Arguidu no Lezada ninian nebe la hanesan halo Ministeriu Publiku liu husi procurador estagiariu Ernani Rangel hatete, deklarasaun lezada ho arguidu hamosu duvidas barak, tan ne’e hatoo pedidu ba tribunal atu halo akariasaun, remata akariasaun entre arguidu ho lezada kontinua iha duvidas. Informasaun kompletu iha STL Jornal no STL Web, edisaun Sesta (13/9). Timotio Gusmão
