Loke Subar Jogu Ilegal, Cornelio Hasoru TDD

DILI-Maske governu kria ona dekretu lei hodi bandu sidadaun TL labele servisu ba jogu iha illegal, maibe tanba kampu servisu laiha ema kontinua halao atividade nee.

Liu husi audensia julgamentu tribunal lee sai akuzasaun husi Ministeriu Publiku (MP) katak, arguidu Fernando Maia dos Santos nudar nain ba jogu illegal bola guling neebe lokaliza iha area Comoro, Dili iha 2014 ho tipu laiha lisensa husi dekretu lei governu numeru 6/2009 kona ba eksplorasaun jogu lotaria no sosiais. Arguidu Cornelio de Deus ho arguidu Emidio Fatima nudar funsionariu iha jogu nee hodi hetan osan ka lukru.

Jogu nee loron-loron hahu loke tuku 8:00 kalan, neebe kada loron hetan rendimentu $200 too 400. No iha loron (17/2/2015) tuku 20:00 dader polisia halo kooperasaun ba jogu ilegal hodi prende no kaptura arguidu sira. Ho ida nee MP akuza arguidu hanesan autor material ba krime eksplorasaun jogu illegal neebe hatur iha artigu 322 kodigu penal TL.

Hatan ba akuzasaun nee arguidu Cornelio de Jesus deklara katak, akuzasaun nee los hotu. Los duni nia servisu ba arguidu Fernando do Santos. Iha jogu nee sorte diak kalan ida bele hetan $ 400 too 500, mais sorte ladiak laiha liu. Husi osan nee arguidu Fernando selu nia ho arguidu Cornelio $20 kalan ida, selae $10 deit. Nia servisu ho arguidu durante fulan ida resin.

Iha biban nee arguidu Fernando labele fo nia deklarasaun, tanba arguidu agora ho kondisaun hanesan alezadu, tanba sofre moras struk. Entertantu arguidu seluk mos fo nia deklarasaun hanesan arguidu Cornelio.

Rona tiha depoimentu husi arguidu sira, tribunal submete kedas ba iha alegasaun final. Nunee MP husu ba tribunal atu aplika pena tuir lei neebe iha, tanba arguidu konfesa hotu faktus neebe imputa ba sira. Entertantu parte defesa husu pena neebe justu. Audensia nee adia fali ba loron (30/06) tuku 10:00 dader. Informasaun kompletu iha STL jornal no STL Web, edisaun Sesta (17/6/2016). Domingas Gomes

LEAVE A REPLY

Please enter your comment!
Please enter your name here