Lori Kapasete Baku Antonio, Natalina Hatan Tribunal

DILI-Antonio Israel da Costa Galhos halo keisa hasoru nia kaben Natalina Guterres, tanba lori kapasete baku nia ulun too monu ba rai.

Tuir akuzasaun husi Ministeriu Publiku katak, iha loron 19/ 10/ 2015 arguida ho nia oan ho nia kuinada ba treinu motor iha Tasitolu. Tuku 19h00 kalan bainhira too ba uma, lezadu sai mai koalia barak hodi hirus no tolok nia oan Miguel, tanba tuir arguida ba treinu motor.

Ho nunee halo arguida hirus, hodi foti kapasete baku iha lezadu nia ulun halo lezadu monu tun ba rai no dezmaia.

Hatan ba akuzaun nee, arguida deklara, akuzasaun nee balu los no balu la los. Los duni arguida lori kapasete baku ba lezadu nia ulun hodi monu ba rai, maibe la dezmaia.

Iha fatin hanesan testamuna Amelia da Silva deklara, iha momentu neeba nia mak ba hamutuk ho arguida Natalina ho nia oan mane Miguel, hodi treinu motor iha Tasi tolu. Too iha uma, lezadu sai mai hodi bolu nia oan mane dehan, Miguel, Miguel nusa mak o tuir o nia inan ba puta iha neebe? lezadu dehan tan ba arguida katak, oan ida ikun nee laos hau nia oan.

Tanba ho lezadu nia tolok no tarata arguida, mak halo arguida nervoza hodi foti kapasete baku dala ida iha lezadu nia ulun, halo lezadu monu ba rai, maibe lezadu la dezmaia ida. Ho ida nee lezadu hader mai hodi tebe arguida, halo arguida hakilar ba Amelia husu ajuda atu bolu polisia, hodi telefone ba numeru 112 maibe laiha responde. Nunee Amelia ho motor ba bolu polisia iha Becora, depois mak Amelia ho polisia mai hamutuk hodi hakalma situasaun.

Depois rona deklarasaun husi parte rua, Ministeriu Publiku husu tribunal atu rona fali deklarasaun husi testamuna Aristoteles, tanba iha momentu lezadu monu tun ba rai no dezmaia, Aristoteles mak ba ajuda hodi foti lezadu no fo iis ba nia. Tanba testamuna Aristoteles la marka prezensa mak tribunal fali julgamentu nee ba loron 19 fulan Jullu 2016, tuku 16h00 otl. Informasaun kompletu iha STL Jornal no STL Web, edisaun Kinta (7/7/2016). Gracilda Oliveira/Domingas Gomes

LEAVE A REPLY

Please enter your comment!
Please enter your name here