DILI-Governu liu husi Ministeriu Justisa, liu husi orsamentu geral estadu 2014 propoin milaun 17 resin, hodi halo tan pasaporte digital. Orsamentu nebe propoin sei fo prioridade liu ba iha desenvolvimentu rekursu humanus.
Kestaun ne’e hato’o husi Ministru Justisa Deonisio Babo ba jornalista sira katak orsamentu nebe maka sira propoin atu halo tan pasaporte digital, ho objeitvu atu fasilita diak liu tan visita husi estranjeiru.
Orsamentu nebe mak ami propoin nee, ami mos husu tan orsamentu balun para hodi halo tan ita nia pasaporte digital para fasilita liu tan ita nia visita iha estrangeiro. Espera katak ho orsamentu nebe maka ministeriu propoin Parlamentu Nasional bele aprova, nomos orsamentu balun nebe mak iha relasaun ho servisu nian, dehan Ministru Justisa Deonisio Babo ba jornlista iha PN, Tersa (07/01).
Iha parte seluk Diretora Geral Registu Sivil Maria Fatima hatete, tanba pasaporte nebe mak oras nee TL uza ladun konese iha rai estrangeiru. Tanba sistema nebe iha sei uza manual, nebe oras nee iha programa governu katak iha 2014, fulan Novembru bele halo ona pasaporte digital. Informasaun kompletu iha STL Jornal no STL web, edisaun Kuarta (8/1/2014). Domingas Gomes