METINARO– Atu Minimiza problema iha rai laran maka Nasionalismu Timor nian tenke makas, maibe iha parte seguransa rasik, balun deskonfia oknum PNTL balun involve iha grupo Organizadu.
Preokupasaun ne’e hato’o husi Xefi Estadu Falintil Forsa Defeza Timor Leste (F-FDTL) Lere Anan Timor, ba Jornalista sira Kinta (03/10) Metinaro. Tuir nia katak dokumentu nebe nia hetan, deskunfia iha oknum PNTL balun involve iha krime.
Hau hare ona Dukumentu balun deskonfia oknum ofisiais PNTL balun maka involve iha krime nee la furak ba ita, maibe kuandu F-FDTL balun maka involve hanesan PNTL nee maka hau sei duni sai tiha nia hosi nia kargu no lori nia ba Tribunal, tamba ita labele halimar ho vida Nasaun nian, ita tenke fo imazen diak ba ita nia jerasaun foun, tamba Jerasaun foun nee hanoin katak Nasaun foun nee hamrik mesak, maibe presiza hatene katak Nasaun nee hari ho ran no isin no ema barak maka fakar ran ba rai ida nee, dehan Lere.
Iha Parte seluk Segundu Komandante Polisia Nasional Timor Leste (PNTL), Afonso de Jesus rekonese katak informasaun nebe Maijor Jeneral fo sai ne’e, dala ruma balun los.
“Tamba nee kuandu rona informasaun ruma tenke husu ida atu nunee sei hanesan alerta bot ida ba ita nia PNTL no Ofisiais sira liu liu sira nebe servisu iha instituisaun nee tenke hare deit ba nia knar no responsablidade, hanesan siguransa iha rai laran no ita labele ba mete buat sira nebe iha, karik sira nebe mete iha krime sira nee maka prosesu sei lao, oinsa atu foti desizaun hasoru sira,”dehan nia.Informasaun kompletu iha STL Jornal no STL Web, edisaun Sabado (5/10). Madalena Horta-João Anibal
