DILI–Ema barak dehan osan bele halo buat hotu no liu hosi osan mos bele manan buat hotu, maibe tuir Amu Bispu Don Basilio do Nasimentu, katak maske Timor Leste iha osan barak maibe kuandu laiha kapasidade dezenvolvimentu sei la lao.
Lia hirak ne’e hato’o hosi Amu Bispu Don Basilio do Nasimento, foin lalais ne’e iha Palacio Governu, wainhira hasoru malu ho Primeiru Ministru Interinu, Fernando Lasama de Araujo, hodi kolia konaba atu konvida Papa Fransisco I mai iha TL Tinan, iha tinan oin.
Atu dezenvolve TL laos deit osan tanba ita bele iha osan barak maibe kakutak la lao hanesan deit, o hakoi o nia aon iha osan leten, tanba ne’e atu dezenvolve nasaun ida ne’e tenke dezenvolve uluk kakutak maibe buat ida kakutak ne’e iha TL kuran, tanba universidade barak mas profesores kuran no profesores tenke hakat pasu ida liu alunus se profesores fehuk ho alunus hanesan ita sei la lao, dehan Don Basilio.
Iha fatin hanesan Prezidente Konselho Nasional Joventude de Timor Leste (CNJTL), Leovigildo Hornai, mos hatete edukasaun importante tebes iha ema nia moris tanba ne’e husu ba inan ho aman sira laiha rajaun atu la dudu oan sira ba eskola. Informasaun kompletu iha STL Jornal no STL Web, edisaun Sabado (8/2/2014). Thomas Sanches