DILI- Relasiona ho lamentasaun husi juventude hadomi futebol, konaba pasaporte nebe foin lalais Diresaun Nasional dos Registo e Notariade (DNRN) halo ba jogadores naturalisasi nain 5, hodi tuir kompetisaun iha rai liur katak la legal no falsu. Maibe parte husi DNRN rasik konsidera ne’e legal.
Diretora DNRN Maria do R. Fatima C. Araujo hatete, pasaporte hirak ne’e diresaun halo bazeia ba despaisu dokumentus husi federasaun Futebol Timor Leste (FFTL). Diresaun DNRN prosesu pasaporte ba jogador naturalisasai nain 5, bazeia ba regulamentu ou forma nebe iha.
Instituisaun ida atu mai halo pasaporte tenke mai ho karta ofisial i kolektivu. No bazeia ba pasaporte jogador naturalisasaun foin lalais, diresaun hetan karta ofisial husi FFTL aneksu ho dokumentus nebe iha atu bele aplika, tamba iha dokumentus ne’e jogador naturalisasaun nain 5. Maske sira moris iha Brazil maibe sira nia inan, aman ou avo ema Timor. Tamba nee, ami konsidera pasaporte ba jogador naturalisasi nain 5 nee legal, karik ikus mosu buat ruma diresaun prontu ba hatan, mais atu hateten deit ami halo pasaporte tenke bazeia ba dokumentus legal, afirma diretora ne’e.
Antes nee, porta voz Joventude Hadomi Futebol, Domingos Ximenes, konsidera pasaporte nebe halo ba jogador naturalisasi nee falsu no illegal, tamba jogador naturalisasi nain 5 nee laos sidadaun Timor oan, maibe sira hetan pasaporte RDTL. Informasaun kompletu iha STL Jornal no STL Web, edisaun Sabado (15/2/2014). Domingas Gomes