PM Rui”: “Governu Kontinua La Simu Desizaun PR”

DILI – Sestu Governu Konstitusional neebe mak lidera husi Primeiru Ministru Rui Maria de Araujo, kontinua mantein pozisaun hodi kontra ou la simu desijaun Prezidente Republika Taur Matan Ruak neebe mak nomeia Brigadeiru Jeneral Filomeno Paixao ba kargu Maijor Jeneral.

Deklarasaun nee fo sai husi Primeiru Ministru, Rui Maria de Araujo, ba jornalista sira iha Palacio Governu, wainhira remata enkontru hamutuk ho Maijor Jeneral Lere Anan Timur, Brigadeiru Jeneral Filomeno Paixao nomos Ministru Defeza Cirilo Cristovao, Segunda (29/02/2016).

Governu nia pozisaun klaru, governu la simu desizaun neebe mak Prezidente da Republika foti no lori ba Tribunal Rekursu no depois ita hein desijaun husi Tribunal Rekursu desidi halo nusa no karta nee ami haruka ona ba iha Tribunal Rekursu semana ida liu ba,” hatete PM Rui.

Nia hatutan Governu mos haruka ona rejultadu husi estudu viabilidade ba projeitu tasi mane inklui mos ZEESM ba Prezidente Republika Taur Matan Ruak, tanba Prezidente Republika iha kompetensia atu husu ba Governu tuir Konstitusaun haruka.

Iha fatin ketak tuir Ofisial Justisa Tribunal Rekursu neebe mak lakohi temi sai nia naran hatete Governu haruka ona rekursu ba Tribunal Rekursu relasiona ho desijaun Prezidente Republika nian, konaba nomeasaun Brigadeiru Jeneral Filomeno Paixao hodi troka Maijor Jeneral Lere Anan Timur.

Entertantu Maijor Jeneral, Lere Anan Timur, rasik lakohi fo ninia komentariu wainhira remata enkontru ho Primeiru Ministru Rui Maria de Araujo nomos Ministru Defeza Cirilo Cristovao. Informasaun kompletu iha STL Jornal no STL Web, edisaun Tersa (1/3/2016). Thomas Sanches/Alvaro do Rego

LEAVE A REPLY

Please enter your comment!
Please enter your name here