DILI–Polisia Militar (PM) agora dadaun sei halo operasaun ba sidadaun sivil sira ne’ebe mak uza farda military, no karik hetan sei kolu obriga tanba lei la fo dalan ba ema sivil atu uza farda militar.
Deklarasaun ne’e hato’o hosi Komandante Jeral Falintil Forsa Defeza Timor Leste (F-FDTL) Maijor Jeneral, Lere Anan Timur, ba jornalista sira iha palacio prezidensial Aitarak Laran, Kinta (07/11) hafoin remata halo inkontru ho Prezidente Republika, Taur Matan Ruak, hodi informa situasaun rai laran.
Hau fo mensajen ba sivil sira ne’ebe mak tau farda hodi lao tun sae ne’e komesa ohin ba oin ami sei atua ou hasai farda ne’ebe mak sira uza karik hetan tanba timor ne’e ema ne’ebe hetan autorijasaun uza farda mak PNTL ho F-FDTL mais sira seluk laiha izemplu hanesan maluk CPD-RDTL ne’ebe mak uza farda lao tun sae se imi hadomi nasaun no terus mos ba nasaun ida ne’e tenke kumpri ba lei aban ou bai rua hau hasai ordem ona ba Polisia Militar haruka kaer hasai tiha farda depois husik fali, dehan Lere.
Lere Anan Timur, mos hatutan tan katak ida ne’e krime ida nomos durante ne’e ema halimar demais ona ho lei la kumpri, tanba ne’e kuandu hare se deit mak laos PNTL no FDTL mak uza farda sei kaer no hasai. Informasaun kompletu iha STL Jornal no STL Web, edisaun Sesta (8/11). Thomas Sanches