DILI—Komandu Jeral Polisia Nasional Timor Leste (PNTL), komisariu Longuinhos Monteiro hateten, komandu simu ona karta husi Presidente Tribunal Rekursu, konaba grau de amiasa ba iha juis, tamba ne’e sira sei fo apoiu.
Komisariu Long hateten karta despaixu husi Tribunal Rekursu komandu simu ona, atu bele halo protesaun ba juis, komandu jeral mos hare ona problema refere para atu trata efetivu koloka tan polisia Corpo Seguransa Pesoal.
Espera ohin ka aban kolokasaun membru Corpo Seguransa Pesoal ba iha juis sira sei halao’o ona. Nune’e mos kona ba kontinuasaun operasaun ba iha dadur nain 3 nebe’e to’o agora seidauk kaer, oras nee tama ona iha planu komandu jeral nian, dehan Longuinhos ba STL iha Kuartel Jeral PNTL Kaikoli Dili, Kinta (23/01/2014).
Hatan ba kestaun ne’e, Ministru Justisa Deonisio Babo Soares, hatete nia parte seidauk hetan informasaun nebe klaru kona ba juis sira nebe hetan ameasa. Maibe nia parte simu ona karta nebe’e maka juis sira haruka ba komandu PNTL. Informasaun kompletu iha STL Jornal no STL Web, edisaun Sesta (24/1/2014). Sonia Ferreira-Domingas Gomes
