DILI-Polisia Nasional Timor-Leste (PNTL), liu husi Unidade Patrulhamento Fronteira (UPF) iha loron hirak liu ba, kaptura tan Grupu Artemarsiais Persaudaraan Setia Hati Terrate (PSHT) hamutuk nain 25 iha Fronteira, Palaka, Sub-Distrito Balibo, Distrito Bobonaro, maibe antes nee sira nain 60 mos hakarak koko atu tama ba Indonesia, tamba Rajaun la Klaru PNTL haruka sira fila.
Komandante Operasaun Nasional Polisia, Superintendente Xefi Armando Monteiro haktuir, membru PSHT hirak ne’e, UPF konsega kaptura tanba servisu hamutuk ho SATGAS PANTAS TNI, sira liu husi dalan legal, maibe parte polisia deskonfia ne’ebe sira kaptura, tanba membru PSHT hirak ne’e atu ba pengesahan (sa’e warga) iha Indonesia.
Ita nia UPF kopera ho SATGAS PANTAS, nune’e ita bele kaptura membru PSHT hirak ne’e sira hanoin katak iha liña fronteira ne’e livre hela maibe laiha ita nia koperasaun ne’e metin, no sira ne’ebe mak liu husi dalan tikus halo estraga tan aktividade komunidade sira nian entaun halo asaun sira halai namkari no polisia kaptura, dehan Armando ba Jornalista Kuarta, (20/11/2013) iha Kuartel Jeral PNTL, Kaikoli, Dili.
Nia hatutan, membru Artemarsiais PSHT sira nain 15 kaer iha loron Sesta (15/11), no nain ualu (8) kaer Segunda (18/11) lorokraik. Polisia kaptura membru hirak ne’e tanba foin lalais Estadu TL hasai rezolusaun ida hodi taka permanente organizasaun artemarsiais 3 hanesan PSHT, KERA SAKTI, no Kork, maibe oras ne’e membru PSHT kontinua ba sae sabuk (Sae warga) iha Indonesia. Informasaun kompletu iha STL Jornal no STL Web, edisaun Sesta (22/11/2013). Madalena Horta
