PR Kontinua Apoiu Konventu Halibur Orfonatu

DILI, STLNEWS.co – Prezidensia Republika (PR) liu husi Xefi Kaza Sivil Jesuina Maria Gomes kontinua apoiu sosial ba konventu neebe halibur Orfonatu iha Munisipiu Likisa no Bobonaro.

Apoiu sosial neebe fo husi Prezidente Repúblika mak hanesan foos nutritivu neebe Prezidénsia Republika hetan ajudu husi grupu empreza nasaun Malazia, neebe apoiu programa Xefe Estadu Ramos-Horta hodi kombate mal-nutrisaun ba labarik sira iha Timor Leste.

Xefe Kaza Civil Jesuína Gomes hafoin halao distribuisaun iha Likisa, Sabadu nee (19/08/2023) hatete, Prezidensia Republika kontinua distribui fos nutritivu ba grupu alvu sira.

“Ohin, ita mai iha konventu Sta. Terezinha do Menino Jesus iha Likisa, kontinua ba Loes iha Irmã ISMAIK sira, hafoin Tunu-Bibi (Bobonaro), Irmã Franciscana Hospitaleira, kontinua ba Madre SSPS iha Akar-Laran (Bobonaro) no ikus liu ba Madre sira husi kogregasaun Reparação Nossa Senhora de Fátima iha Memo (Bobonaro), neebe iha knaar boot liu hodi ajuda mos ba ita-nia komunidade neebe moris ho kondisaun mínimu no ho mal-nutrisaun neebe aas,’’ dehan Xefe Kaza Sivil.

Nia hatutan, ba kada konventu oferese fos nutritivu ho total sakas 60 no tuir planu sei kontinua distribui mos ba grupu alvu sira neebe halo ona identifikasaun iha territoriu nasional liuliu iha orfanatu sira.

Iha biban nee, Me. Ermelinda de Jesus hatoo agradese ba Prezidente Republika liu husi Xefi Kaza Sivil neebe apoiu ona fos nutritivu hodi ajuda labarik sira iha Orfonatu.

‘’Ami agradese tebes ba Maromak liu husi Prezidente Repúblika Jose Ramos-Horta neebe haraik ona mai ami, fos nutritivu ida nee hodi ajuda ami-nia alin sira,’’ espresa Me. Ermelinda de Jesus.

Nunee mos Ir. Imaculada Ximenes husi Sentru ISMAIK hatoo obrigado no agradese wain ba Prezidente Republika nia tulun ba Orfonatu sira.

Ir Imaculada dehan lori Sentru ISMAIK hatoo mos agradesimentu ba Xefe Estadu Ramos Horta nia tulun ba orfanatu sira tuir misaun ISMAIK nian ho objetivu atu prepera labarik sira ba futuru kreda no nasaun.

Nunee mos Me. Apolónia Fátima Ramos Martins hosi konventu Franciscana de Hospitalidade Tunu-Bibi, hatete sente orgullu ba ajudu sira neebe hetan husi Prezidensia Republika.

“Sente orgullu ba ajudu sira neebe hetan hosi Prezidensia Republika no konsidera, ‘’hanesan grasa boot ida neebe Maromak haraik mai ami liu hosi prezensa Prezidensia Repubika,’’ katak Me. Apolónia.

Tuir dadus, konventu Maubara iha total orfanatu hamutuk 21, Loes iha 100-resin, Tunu-Bibi iha nain 31, Akar-Laran iha 15, Memo iha família kuaze 100-resin, neebe maioria moris hosi família vulneravel no inan-aman neebe mate ona.

Antes nee, Xefi Kaza Sivil Jesuína Gomes inisia ona distribuisaun fos nutritivu iha Munisípiu Likisa Postu-Administrativu Bazartete iha loron 16 Agostu nee, ba Pre-Eskolae Bermeta Haburas neebe funda husi veterana Madalena Bidau Soares “Kasian’’ ho fos hamutuk 50.

(eme)

LEAVE A REPLY

Please enter your comment!
Please enter your name here