DILI-Arguido nain hitu (7) nebe involve iha atividade droga hetan pena husi Tribunal Distrital Dili (TDD) nebe la hanesan. Pena nebe hatun ba sira nain hitu tuir ida-idak nia krimi. Pena nebe todan liu mak arguido Juga Frans Xavier Gama, tinan 10 iha prizaun no Desi Alex Lenku hetan kastigu prizaun tinan 8.
Juiz Presidente kolektivu Duarte Tilman, hasai desizaun kastigu prizaun tinan 10 ba arguido Juga Gama, arguida Desi Alex Lenku (Indonesia) hetan prizaun tinan 8, arguido Dionisio Francisco kastigu prizaun tinan 7 fulan 6, arguido Anastasio kastigu prizaun tinan 6 fulan 6, Sri Darmayanti (Indonesia) tinan 6 fulan 6, Lim Cien Chen (Singapura) tinan ida (la tama kadeia) maibe durante tinan ida labele halo tan problema, nune mos ba Nelia Maria de Oliveira hetan fulan nen iha uma.
Arguido Juga Gama mak hanesan trafiku aktivu droga, nia mak fan, no sosa. Arguida Desi no Sri mos autor ba droga, tanba sira mak fan. Arguido Anastasio no Deonizio fan no uza droga. No arguida Nelia no arguido Lim Cien Chen hanesan konsume droga ka pasienti narkoba.
Iha Audensia Julgamentu Juga Gama nebe Ministeriu Publiku akuza hanesan arguidu deklara ba tribunal katak Policia Nasional Timor Leste halo kapturasaun iha loron 11 Dezembru 2012 iha ninia hela fatin no policia konsege prende mos Droga Sabu-sabu kuaze 200 ital grama inkliu osan. Informasaun kompletu iha STL Jornal no STL Web, edisaun Kuarta (2/10). Domingas Gomes
