DILI, STLNEWS.co – Governu presiza tau osan ba iha setor agrikultura, hadia irigasaun sira neebe aat, nunee povu agrikultura sira bele ativu halo natar no toos, hodi hasae produsaun iha rai laran, para labele dependensia ba hahan husi rai liur.
Lia hirak nee hatoo husi Eis Prezidente Rede Feto Judite Dias Ximenes ba STL iha nia knaar fatin Kaikoli, Tersa (21/11/2023).
Nia hatete, presiza hasae produsaun rai laran, nunee Timor Leste labele dependensia ba iha fos husi rai liur.
“Ita iha rai neebe mak abandona barak tebes no natar barak mak komunidade sira la halo, tanba bee laiha. Governu presiza tau osan masimu ba setor agrikultura hodi hadia bee dalan ka irigasaun sira, nunee komunidade sira ativu halo toos no natar, hodi labele dependensia ba hahan liu-liu foos iha rai liur,” katak nia.
Nia hatutan, Timor Leste mos iha rai bokur barak tebes, maibe abandona deit. Governu presiza haree ida nee, nunee bele loke kampu servisu ba Timor oan sira.
Iha Natarbora emprezaria balun komesa dezenvolve ona rai neebe abandona iha neeba, hodi fo ona servisu ba komunidade sira. Ida nee fo ona hanoin ba iha governu katak, Timor oan barak iha vontade hakarak hadia moris, tanba servisu mak laiha, tanba nee presiza rezolve liu husi loke kampu servisu.
Nunee mos Diretor Ezekutivu Luta Hamutuk, Jose da Costa Alves hatete, governu presiza dezenvolve setor agrikultura iha Timor Leste, rai nee produtivu tebes, lisaun sira agora iha tinan hirak liu Timor oan barak haruka ba Izrael aprende gurun pasir, nee tanba sira nia padan pasir nee sira dezenvolve nakfilak ba setor agrikultura, nusa Timor Leste rai bokur labele halo.
Governu presiza tau osan minimu 25% ba setor agrikula, ba iha Ministeriu Agrikultura para oinsa jere, ida nee hodi dezenvolve no hasae produsaun iha rai laran.
“Presiza halo investimentu, labele komentariu deit no koalia deit, maibe tenki ho real no fo osan makaas husi Orsamentu Jeral Estadu 1.6 Bilhoens nee 25% tenki ba iha agrikultura,” nia tenik.
(eme)
