DILI- ONG Judisial Sistema Monitorizasaun Programa (JSMP), husu ba Parlamentu Nasional (PN) ho Ministeriu Justisa atu kria lei espesial, hodi trata kazu insestu nebe sempre akontese iha familia laran.
Direitor Ezekutivo JSMP Luis Oliveira Sampaio hatete, kuandu lei espesial iha duni sei fo responsabilidade ba Ministeriu Solidaridade Sosial (MSS), atu hadia kondisaun uma komunidade sira nian. Tanba iha kazu balun hatudu uma komunidade sira iha area rural familia ida toba hamutuk iha kuartu ida, entaun bele fo oportunidade ba akontese kazu insestu.
Sampaio haktuir iha tinan 2013, JSMP regista kazu insestu ka relasaun seksual entre aman ba oan, nan ba feto, tiun ba subrinha no padrastu ba oan hamutuk kazu 9. Husi numeru refere maioria hetan kondenasaun ho tinan boot katak hahu husi pena minimu tinan 4 prizaun no pena masimu tinan 16 kadeia.
Kazu insestu ne’e tuir lolos akontese iha sirkunstansia ida esepsional laos hanesan krime bai-bain. Hau hanoin publiku agora konsidera kazu insestu hanesan krime bai-bain, mais ba ami problema nee seriu tebes tanba tuir lolos familia atu proteje mais sira mak komete fali, dehan Luis.
Iha parte seluk liu husi julgamentu juis Jose Maria de Araujo husu ba arguidu nebe mak komete krime violasaun seksual ba subrina, atu labele halo tan iha futuru, bainhira sai husi prizaun. Tanba hahalok nee hanesan malisan nebe aban bain rua ema sei halo fali ba oan sira. Informasaun kompletu iha STL Jornal no STL Web, edisaun Tersa (18/2/2014). Domingas Gomes