DILI–Prijoneru hamutuk 24 ne’ebe halai sai hosi komarka Becora foin lalais ne’e, tuir Komandante Jeral Falintil Forsa Defeza Timor Leste (F-FDTL) Maijor Jeneral, Lere Anan Timur, katak iha ema ruma mak halimar hosi kotuk.
Informasaun ne’e Lere Anan Timur fo sai ba jornalista sira hafoin informa situasaun rai laran ba Prezidente Republika (PR), Taur Matan Ruak, iha palacio prezidente, Kinta (07/11).
Ita la hatene tanba saida mak sira halai no laiha fundamentu ida hanesan iha krize 2006 mais ida ne’e sempre iha ema ruma iha kotuk naun ser sira bulak maibe iha ema ruma iha kotuk mak halo sira halai hanesan prijoneru politiku ne’e oin seluk nia halai tanba defende nia an maibe ida ne’e ita hare kriminozu oho ema no seluk tan mak halai ne’e laiha sentidu ida, hatete Lere.
Maijor Jeneral, Lere Anan Timur, mos hatutan F-FDTL sei fo ninia apoiu kuandu Polisia Nasional Timor Leste (PNTL) labele ona, maibe tuir nia hare Polisia sei bele atu atua prijoneru sira ne’ebe mak halai.
Iha fatin seluk Ministeru Justisa, Dionisio Babo, katak prizioneru sira nebe mak halai sai kuandu la entrga aan sei halo prosesu kriminal foun, tan ne’e husu ba prizioneiru sira nebe mak halai sai husi prizaun tenki intraga aan. Informasaun kompletu iha STL Jornal no STL Web, edisaun Sesta (8/11). Thomas Sanches
