Prizaun Fatin Eduka Ema, Laos Fatin Gratuitu

DILI-Tribunal husu ba arguidu sira neebe hetan pena prizaun labele hanoin kontenti tanba han, hemu no toba iha kama gratuitu. Maibe fatin nee atu hanorin ema no eduka ema moris husi hahalok neebe sala ba los.

Liu husi sala audensia tribunal husu ba kondenadu no arguidu sira neebe mak kumpri ona pena prizaun, atu labele halo tan hahalok nee iha futuru. Labele hanoin katak halo sala tama prizaun, estadu fo han, hemu no toba kama gratis. Maibe tenke hanoin mos ba imi nia futuru, liliu ba jovem sira neebe mak ho idade nurak. Tanba sei iha tempu barak ba imi atu aporveita oportunidade.

Nia hatutan, arguidu sira bainhira sai husi prizaun tenke rehabilita aan ba hahalok neebe mak halo iha pasadu. Atu nunee ba futuru bele moris ho buat foun iha komunidade nia let. Labele hanoin sai husi prizaun, kontinua ho hahalok hanesan para bele han, hemu no toba gratuitu husi estadu. Maibe imi nias futuru laiha liberdade hodi halao imi nia futuru.

Liafuan hanesan hatoo mos husi juiz Antonio do Carmo katak, prizaun laos fatin atu ba han, hemu no toba gratuitu deit. Maibe haneasn fatin neebe atu eduka no hanorin ema ba dalan neebe los. Tanba nee bainhira tama no sai husi fatin nee, tenke halo reflesaun ba imi ida-idak nia an atu nunee labele halo falo hahalok neebe hanesan. Moris iha komunidade nia let tenke ho hahalok neebe diak, atu nunee bele kria ambiente neebe harmonia iha vizinu ka familia nia let.

Iha fatin hanesan arguidu Jose Soares hatete, nia parte arepende ba  nia hahalok neebe nia halo iha pasadu. No sai husi prizaun, nia sei la halo tan hahalok neebe hanesan iha komunidade nia let. Tanba prizaun laos fatin neebe diak ba nia atu hela metin, maibe nee hanesan fatin ida neebe sulan metin ema, laiha liberdade ba nia moris husi hahalok neebe nia halo hasoru ema seluk. Informasaun kompletu iha STL Jornal no STL Web, edisaun Kuarta (18/5/2016). Domingas Gomes

LEAVE A REPLY

Please enter your comment!
Please enter your name here