DILI- Maske suspeito ba kazu krime homesidu agravadu nebe akontese iha suku Samalete, Sub-Distritu Railaco, Distritu Ermera iha loron 06 Fevreiro 2013 halai lakon sai husi prizaun maibe nia prosesu lao nafatin iha tribunal.
Juis Administrador Tribunal Distritu Dili, Dr. Duarte Tilman hatete, hanesan administrador tribunal, TL iha lei kodigo rasik. Iha kodigo prosesu penal hatete dehan presensa arguido nee obrigatorio. No sekuando arguido laiha entaun labele halo julgamentu, maibe iha nia dalan nafatin.
“Ita iha lei kodigo rasik. Iha kodigo prosesu penal hatete dehan presensa arguido nee obrigatorio. No sekuando arguido laiha entaun labele halo julgamentu, maibe iha nia dalan nafatin. Lei hatete dehan kuando arguido laiha, nia prense tiha ona termu de identidade residensia bele halo notifikasaun idital. Iha prazu 20 dias marka fali loron seluk. maibe se nia la mosu julgamentu sei presensa do arguido i reprejentante seluk nebe xefi advogado ida ou defensor nebe reprejenta sira iha kuntinua rona prova nebe mak iha. Nebe maske sira iha liur, prosesu nee lao nafatin para bele garante sira nia presensa iha tribunal. Tanba sira nia direitu nebe mak hatete iha akukzasaun katak sira halo krime duni,” dehan nia.
Iha parte seluk Vice Ministru Justisa Ivo Valente hatete, prizionerio hirak nebe mak halai sai husi prizaun polisia ho guarda prizaun halo esforsu hodi kaptura hikas fali prizionerio, hodi nunee suspeito nebe seidauk halo julgamentu bele marka fali nia julgamentu iha tribunal. Informasaun kompletu iha STL Jornal no STL Web, edisaun Kuarta (13/11). Domingas Gomes