DILI, STLNEWS.co – Relasiona ho sidadaun estranjeiru inisial LB neebe hetan dokumentus identidade Timor nian, oras nee daudaun investigasaun lao hela.
“Agora iha hela investigasaun PNTL no PSIK, iha area ambitu investigasaun kriminal hau hakarak hateten deit, prosesu lao hela, tama ona iha faze segredu justisa, ministru laiha kompetensia atu koalia konaba asaun penal,” dehan Ministru Justisa Amandio Benevides ba jornalista sira iha Salaun MJ, Kuarta (02/08/2023).
Tuir nia, ida nee kompetensia Ministeriu Publiku nian, neebe fo ordem ba iha polisia investigador sira hodi halao sira nia knaar.
Nia esplika, konaba funsionariu sira neebe deskonfia fasilita pasaporte prosesu investigasaun internal sei lao hela seidauk konklui, bainhira investigasaun konklui ona informasaun ne sei fo sai.
Iha fatin ketak, Diretor PSIK Vicente Fernandes Britos katak, prosesu ida nee husi parte PSIK nian rekolha hotu ona informasaun, no repete imediata ba iha MP hodi haree fali.
“Prosesu nee ita rekolha tiha auto notisia de krime, rekolha tiha informasaun indisus konaba faktus ida nee, normalmente partisipa ba iha Ministeriu Publiku nudar asaun penal,” dehan nia.
Nia hatutan, rekolha tiha indisus provas bele sustenta hodi halo auto partisipasaun, tuir lei remete imediata signifika ho prazu neebe razoavel remete auto partisipasaun ba iha Ministeriu Publiku, hodi rejistu no atu tuir tranmitasaun prosesual nebee vigor.
Tuir kronolojia katak, sidadaun estranjeiru ida ho inisial LBT, husi nasaun vizinhu Indonezia,envolve konaba kazu balu iha nia rain, tanba nee objetivu tama mai Timor hodi salva nia aan husi aktu nee, tanba tauk POLRI sira buka tuir.
Maibe liu husi linha koordenasaun entre autoridade seguransa rai rua nee, PSIK deteta lokaliza no halo kedan indentifikasaun ba sidadaun nee, iha rezidensia privadu Fomentu Suku Komoro.
Nunee iha loron 05/07/2023, tuku 16:00, ekipa ba foti sidadaun refere hodi halo investigasaun.
Dokumentus neebe nia hetan hanesan indentidade Timor nian mak hanesan pasaporte, eleitoral, BI, no sertidaun kazamentu.
(ter)
