DILI-Kondenadu Almiro Magno neebe antes nee prezu, maibe halai sai tiha, no entrega an ba polisia. Oras nee detein iha prizaun Polisia Militar (PM).
Tuir Administrador Tribunal Distrital Dili, Duarte Tilman katak, ofisial justisa informa ona katak kondenadu Almiro Dias Pereira hetan oan detensaun hodi kumpri pena iha prizaun PM nian. Kondenadu kolabora hodi mai entrega an ba polisia, nunee tribunal liu husi juisa Jacinta Correia hasai mandadu kapturasaun ba nia hodi kumpri pena iha kadeia PM iha loron 1 fulan Maio 2015, dehan nia ba jornalista iha TDD, Segunda (11/05/2015).
Durante nee ita so rona deit mak kona ba prizaun Becora ho Gleno nian, kadeia ida mos iha Suai maibe ida nee seidauk aktivu. Nunee kondenadu nee tanba seguransa ba nia ladiak, nia ba iha prizaun polisia militar nian para bele seguru ba nia. Tanba nia hetan ameasa husi ema balun, neemak tau nia iha prizaun polisia militar nian para forsa FDTL mak sei halo seguransa ba nia,”tenik Tilman.
Nia hatutan katak, tuir despaisu mandadu kapturasaun nee kondenadu nee komete krime korupsaun pasiva ba aktu elisito tuir artigu 292 kodigu penal Timor Leste, kona ba buat neebe estadu bandu labele maibe nia hakarak halo duni.
Kondenadu Almiro Magno tuir mandadu kapturasaun sei kumpri pena prizaun tinan hat. Maibe sekuandu iha prizaun laran mak nia hatudu nia vontade no hahalok diak, parte ministeriu justisa liu husi diretur prizaun nian sei halo karta mai iha tribunal para bele hamenus nia pena, dehan nia.
Iha parte seluk Prokurador Geral da Republika Jose Ximenes hateten katak, kondenadu Almeiro Dias entrega aan tiha ona, iha loron 01 fulan Maio tinan 2015, no agora dadauk iha hela prizaun, tamba nia komete iha kazu korupsaun. Informasaun kompletu iha STL Jornal no STL Web, edisaun Tersa (12/5/2015). Domingas Gomes
