DILI, STLNEWS.co – Governu liu husi Sekretariu Estadu Komunikasaun Sosial (SEKOMS) kontinua halo diskusaun ho orgaun komunikasaun sosial sira neebe eziste iha Timor Leste.
Tuir SEKOMS Expedito Dias Ximenes katak, IX Governu Konstitusional nia programa iha seitor komunikasaun sosial hatur medida 18 neebe hetan ona aprovasaun husi Parlamentu Nasional atu operasional programa nee.
“SEKOMS hakarak konsulta parseriu sira husi imprensa, audiuvisual, plataforma online sira i parseriu prinsipal mos mak Konselhu Imprensa,” tenik nia liu husi diskursu hafoin abertura konaba atividades Konsultasaun Planu Estratejia SEKOMS iha Salaun Delta Nova, Dili, Kuarta (09/08/2023).
Nia dehan, enkontru nee SEKOMS hakarak halo konsulta ida, atu nunee iha tinan 5 nia laran governu konstitusional bele iha planu estratejiku ida.
Nia akresenta, iha Konstituisaun RDTL iha lei komunikasaun sosial no iha argumentus oin-oin neebe iha idak idak nia instituisaun, maibe SEKOMS mak tau matan ba iha area komunikasaun sosial, presiza iha mos planu estratejiku ida, hanesan vizaun jeral tinan 5 nia laran.
“Hau hanoin ho objetivu ida nee mak SEKOMS halibur ita boot sira iha fatin ida nee, hanesan parseriu prinsipal atu ita fo hanoin ba malu oinsa ita bele planeia no fo kontribuisaun ba ita nia planu estratejiku sira iha komunikasaun sosial,” dehan nia.
Governante nee akresenta, objetivu prinisipal husi konsulta ida nee SEKOMS hakarak rona besik liu tan, liu-liu pontu de vista parseriu sira nian konaba kooperasaun neebe durante nee lao ona, nunee mos diskuti hamutuk programa no atividades sira neebe realiza iha futuru iha mandatu IX Governu nian.
Iha fatin hanesan, Diretor Jeral MAPKOMS, Ponciano da Cruz Leite husu ba parseriu husi orgaun komunikasaun sosial sira atu ativu iha atividades diskusaun neebe mak organiza husi SEKOMS.
“Hanesan Diretor Jeral husu deit ita hotu nia partisipasaun ativa iha ativiadades ida nee,” nia afirma.
Nia parte mos agradese ba parseria sira hotu nia disponivilidade atu responde konvite neebe sira hatoo, tanba nee presiza ativu iha diskusaun ida nee.
(mar)
