DILI-Problema infranstrutura iha Timor-Leste maske tama ona ukun an tinan sanolu, nunka iha solusaun. Liu-liu infrastrutura haree husi parte estrada iha teritoriu Timor laran tomak nebe kontinua taka no loke kuak. Eis Primeiru Ministru, Mari Alkatiri hateten, problema infranstrutura nee akontese no nunka iha solusaun, tanba sistema mak la funsiona ho diak.
“Sistema mak la funsiona, maske hau agora koopera para atu hadia, maibe hau mos tenke iha sentidu kritika nafatin, see lae buat sira nee la hadia. Hau hakarak hateten, buat sira nee la lao ho didiak tanba sistema mak la funsiona. Tanba, dalabarak kuandu ita tau osan barak demais no sistema la funsiona, maka buat sira nee sei sai aat liu tan,” hateten Alkatiri ba jornalista hafoin inkontru ho Sekretariu Estadu Politika Formasaun Profesional (SEPFOPE), Ilidio Ximenes da Costa, iha ninia rezidensia, Farol-Dili, Tersa (07/05/2013).
Aktual Sekretariu Jeral Partidu Fretilin nee mos haktuir, nia rasik foin lalais nee, iha diskusaun OJE 2013, tuur iha Parlamentu Nasional nudar deputadu, para hodi fo kontribuisuan pozitivu. “Tanba ita labele iha hanoin katak osan deit maka atu rezolve ita nian problema. Sistema fundamental ba administrasaun no jestaun inklui fiskalizasaun nee mak sei rezolve ita nia problema, tanba osan nee mai atu ajuda deit, no sistema mak determinante,” deklara Alkatiri.
Alkatiri mos fo hanoin katak, kuandu osan barak, no sistema la diak, osan mos la ajuda, no buat ida mos sei la mosu. “Maibe agora, ita hotu hamutuk hodi hadia buat sira nee hotu,” akresenta Alkatiri. Parte seluk, problema estrada laos deit sai preokupasaun husi Eis Primeiru Ministru, Marii Alkatiri, maibe deputadu sira iha Uma Fukun Parlamentu Nasional no mos povu sempre kestiona kualidade estrada iha Timor laran tomak, espesialmente estrada iha Dili laran.
Deputadu sira liu husi sesaun plenaria, sempre kestiona problema estrada ba meja parlamentu, atu bele fo atensaun ba governu hodi hadia ou rehabilita estrada ho kualidade. Prezidente Komisaun E Parlamentu Nasional (PN) ba asuntu infranstrutura, transporte no komunikasaun, Deputadu Pedro da Costa, hateten, kondisaun estrada nebee aat nee bele mos provoka dezastre iha Dili laran, maibe bazeia ba informasaun nebe iha, Ministeriu Obras Publiku komesa tau atensaun ba kompania sira nebe halao prosesu rehabilitasuan ba estrada sira iha Kapital Dili laran.
Nunee mos Deputadu Bankada FRETILIN, Inacio Moreira hanesan mos membru Komisaun E PN, hateten, kontratores sira nebe manan tender halo estradas nee tenki responsabiliza, no orsamentu por volta de sincu milhoes atu hadia estradas iha Dili laran.
“Ita hare estradas sira iha Dili laran alokasaun orsamentu iha ona mai kedan husi governasaun AMP nian. Ita foin lao ba tinan ida, hafoin governu AMP hakotu sira nia mandatu, no osan mos kontinua aloka ona maibe estrada kontinua kuak ba bebeik. Hau husu governu AMP tenki toma responsabilidade ba orsamentu hotu-hotu nebe mak aloka hodi hadia estradas sira iha Dili laran,” hateten Deputadu Inacio. arm
