DILI, STLNEWS.co – Jurista Timor oan preokupa konaba maneira neeebe Sentru Formasaun Juridiku no Judisiariu (CFJJ-sigla portugues) iha, tanba materia barak mak hanorin ho lian portugues, no konsidera katak lingua sai preokupasaun boot.
“Ita iha duni problema konaba lingua, no estudante barak neebe remata estudu direitu iha universidade sira barak liu iha konesementu konaba lingua tetun, oinsa mak adapta ho lei sira neebe iha,” dehan Jurista Jose Guterres ba STL iha tribunal, Tersa (07/11/2023).
Nia hatutan, kestaun ida mak Timor oan balu hatene klean konaba prosedimentu nee, tanba nee estadu liu husi sentru formasaun presija rekruta ema Timor oan neebe iha espesialidade ba lei sivil, no krime nian atu bele hanorin Timor oan sira neebe iha konhesimentu barak liu ba lian tetun.
Se lae kada tinan rekruta ema mai husi liur hasai osan barak, nusa la investe ba Timor oan sira neebe buka hela servisu, se lae fo bolsu estadu ba iha Timor oan atu sira bele aprende atu sira bele hanorin, maibe depende ba boa vontade governu nian.
Iha fatin ketak, Diretora Sentru Formasaun Juridiku no Judisiariu Marcelina Tilman dehan, sentru formasaun liu husi formador sira tenki hanorin materia sira ho lian portugues, tanba haree ba ita nia lei barak mak hakerek ho lian portugues.
“Formador sira nee mai husi rai liur, tanba nee materia neebe hanorin barak ho lian portugues, nee laos foin agora, maibe dezde Sentru Formasaun hahu loke,” dehan nia.
Diretora nee hatutan, sentru formasaun nafatin produs formados sira ho kualidade, tanba nee formados neebe tama iha sentru formasaun tenki esforsu aan aprende no tenki iha konhesimentu diak konaba lingua portugues.
(ter)
