Tenta Halai Sai Husi Uma, Lorença Simu Basa

DILI-Tenta halai sai husi uma, lezada Lorença de Fatima simu basa isin ida iha nia hasan parte los husi nia kaben arguidu Flaviano de Araujo.

Tuir akuzasaun husi Ministeriu Publiku katak, iha loron 8 Desembru 2014 meudia iha Tasitolu mosu diskusaun entre arguidu no lezada. Nunee lezada husu atu ba hela iha Kampung Baru, rona ida nee arguidu basa isin ida iha lezada nia hasan parte los dala ida. Ho hahalok arguidu nian, ministeriu publiku akuza arguidu komete krime violensia domestika neebe previstu iha artigu 145 kodigu penal TL.

Hatan ba akuzasaun nee arguidu deklara katak, akuzasaun nee los hotu. Nia basa lezada tanba atu ba hela fali ho nia subrinho sira iha kampung Baru. Nudar laen, arguidu senti la kontenti neemak nia basa dala ida iha lezada nia hasan. Desde problema parte rua foin mak diak malu iha fulan ida nee nia laran, maske hela hamutuk hanesan fen ho laen maibe la koalia ba malu.

Iha fatin hanesan lezada Lorença hatete, momentu nee sira istoria malu duni. Tanba ho nervozu lezada husu atu ba hela ho nia subrinu sira iha Kampung Baru, neemak arguidu basa nia hasan dala ida. Neemak nia halai ba kesar iha polisia. Desde problema, sira nain rua foin mak dame malu iha tinan 2016 nia laran.

Depois rona tiha deklarasaun husi parte rua nian, tribunal submete kedas ba iha alegasaun final. Nunee ministeriu publiku husu ba tribunal atu aplika pena trizaun fulan nen no suspende ba tinan ida. Entertantu parte defesa husu ba tribunal atu aplika pena suspensaun neebe adekuadu. Informasaun kompletu iha STL Jornal no STL Web, edisaun Kinta (18/2/2016). Domingas Gomes

LEAVE A REPLY

Please enter your comment!
Please enter your name here