Timoroan Lakon Funu Balun Hetan Violasaun Seksual

DILI-Timoroan balun neebe iha tempu okupasaun sira halibur iha funu laran lori ba Indonesia balun hetan violasaun seksual, tanba sira lahatene sira nia inan aman orijinal no sira hotu-hotu iha inan aman hakiak dala barak sira halo violensia oioin inklui violensia seksual.

Informasaun nee fo sai husi Direktor ezekutivu AJAR (Asia Justice And Right), Jose Luis Oliveira ba STL iha nia knar fatin Farol-Dili, kuarta (25/05/2016).

Inan aman hakiak dala barak sira halo violensia oioin inklui violensia seksual, nee akontese duni husi sira nia aman hakiak rasik no koko atu estraga sira, nee iha. Agora sira boot hotu ona, uluk sira sai husi nee sei labarik agora sira kabe nain ona,” dehan Direktor AJAR.

Direktor AJAR Jose Luis Oliveira hateten, labarik sira nee vitima husi estratejia funu, uluk ema indonesia nee hakarak okupa ita nee laos okupa husi aspeitu fiziku deit maibe okupa timor oan tanba nee agora sira moris ho kultura Indonesia ona, relijiaun islam hotu no sira lahatene sira nia inan aman orijinal.

Direktor AJAR, salenta tan, sira serbisu nee ba dala tolu ona, iha 2014 sira lori nain 7 iha 2015 sira lori 15 agora 12 hamutuk 34. Sira halo ida nee ho razaun umanidade nudar parte ida atu provoka, estimula atu estadu nia responsabilidade ba asuntu nee tuir lolos nee responsabilidade estadu rua Timor Leste no Indonesia.

Iha fatin ketak, Deputadu Bankada PD, Virgilho Hornai dehan, orgaun naun governamental hanesan parseria governu nian tenke halo tanba parte rua nee kompleta malu. Timoroan sira ba tanba konsekuensia funu ikus sira fahe malu husi sira nia familia. Informasaun kompletu iha STL Jornal no STL Web, edisaun Sabado (28/5/2016). Raimundo S. Fraga

LEAVE A REPLY

Please enter your comment!
Please enter your name here