DILI-Amelia da cruz ne’ebe Ministeriu Publiku (MP) notifika hanesan lezada tenki simu basa dala rua husi nia banin mane Hermengildo do Santos, tamba hasai lia fuan a’at ba nia banin.
Tuir akuzsaun nebe lee sai husi juis singular Jose Maria Araujo katak, iha loron 3 Setembru 2013, lezada foin fila husi merkadu. Arguido Gabriel nebe hanesan lezada nia kaben husu ba lezada atu tein, maibe lezada lakohi, nune mosu diskusaun entre arguido Gabriel ho lezada, no husi diskusaun nee lezada tolok arguido Gabriel, no rona dereitamente husi arguido Hermengildo.
Nunee arguido Hermengildo hanesan arguido Gabriel nia aman, husu ba lezada tanba sa mak tolok ema mane nunee. Depois arguido fo basa dala rua iha lezada nia hasan sorin-sorin. Simu basa tiha husi nia banin mane, lezada halai tama ba kuartu laran, depois arguido Gabriel tuir lezada ba kuartu laran hodi tuku lezada nia kanuruk to’o lezada monu.
Hafoin rona tiha akuzasaun arguido nain rua konfesa ba tribunal katak akuzasaun huis MP nee los hotu, no arguido sira basa no baku lezada nee, tanba la simu ho lezada nia atitude nebe hasai lia fuat at iha uma laran.
Hafoin rona deklarasaun husi arguido nain rua tribunal fo tempu ba MP atu halo kedas alegasaun, iha alegasaun MP husu atu aplika pena prizaun tinan 2, maibe suspende tiha ba tinan 1. Informasaun kompletu iha STL Jornal no STL Web, edisaun Kinta (12/12/2013). Domingas Gomes